ഫറോക്ക്: ചെറുവണ്ണൂർ - കൊളത്തറ റോഡിൻ്റെ സ്ഥലമെടുപ്പിൽ കച്ചവടക്കാർക്കുള്ള പുനരധിവാസ പാക്കേജിന് അംഗീകാരമായതായി പൊതുമരാമത്ത് -ടൂറിസം വകുപ്പ് മന്ത്രി പി എ മുഹമ്മദ് റിയാസ് വ്യക്തമാക്കി.
റോഡിന്റെ നവീകരണത്തിനായി ഏറ്റെടുക്കുന്ന ഭൂമിയിൽ ഉൾപ്പെട്ട കച്ചവടക്കാർക്കെന്ന പോലെ തൊഴിലാളികൾക്കും പുനരധിവാസ പാക്കേജ് പ്രകാരം ആനുകൂല്യം ലഭിക്കും. ഇതുപ്രകാരം കച്ചവട സ്ഥാപനങ്ങൾക്ക് പരമാവധി 2 ലക്ഷം രൂപയും സ്ഥാപനത്തിലെ 2 തൊഴിലാളികൾക്ക് പ്രതിമാസം 6000 രൂപ പ്രകാരം 6 മാസത്തേക്ക് 36000 രൂപയുമാണ് ലഭിക്കുക.16 സ്ഥാപനങ്ങളാണ് ഈ റോഡിനായി ഏറ്റെടുക്കുന്ന സ്ഥലത്തുള്ളത്. റോഡ് നവീകരണത്തിനായി 12.34 കോടിയുടെ പ്രവൃത്തി ടെൻഡർ ചെയ്ത് പ്രാരംഭ നടപടികൾ ആരംഭിച്ചിട്ടുണ്ട്.
സ്ഥലമെടുപ്പിന് രണ്ട് തവണയായി 26.52 കോടിയും 5.28 കോടിയും അനുവദിച്ചിരുന്നു. നടപടികൾ ത്വരിതപ്പെടുത്താൻ നിർദ്ദേശം നൽകിയതായി മന്ത്രി അറിയിച്ചു.
